Hold-up, paggamit it ilegal nga droga, pagkidnap, pagpang-abuso ag pagpatay.
Haeos tanan eon lang nga krimen hay na-hulicam eon sa makaron nga tiempo.
Kon amat, antes pa nga maka-abot sa kasayuran it mga awtoridad hay kalhit eon online.
Madaling minutos pa eamang nga naka-post, viral eon.
Okay man sigon sa kapulisan ro gina-obra nga pag-post it krimen sa social media.
Raya hay nagapamatuod sigon nga nagataas ro lebel it vigilance ukon pagka-alerto it publiko.
Pinaagi kara, maipaabot it pumueuyu sa mga awtoridad ag natungdan nga ahensya it gobyerno ro mga nagakatabu sa andang lugar.
Ginapadumdum eamang sa mga naga-post nga maging madahan.
Indi pagpasugtan nga mabutang sa aeang-aeang ro atong kabuhi.
Angot kara, dapat man nga mas pang pabaskugon it natungdan ro ginapatigayon nga Cyber Patrolling sa nasyon.
Kinahangean man nga i-validate ro tanan nga mga video nga nagakalhit sa social media.
Eabi pa ag may mga report nga kaabuan sigon sa mga videos nga naga-viral hay natabu pilang dag-on eon ro nagtaliwan ag naresolba eon it mga awtoridad.
May pilang indibidwal nga naga-recycle it mga video agud nga makabo-oe pa it mas maabung followers ukon paguwaon nga unstable ro atong gobyerno.
Indi maitago nga may mga pasaway gid man sa palibot.
Kumbaga kon maka-usoy it kahigayunan nga kumita, magahimo it pamaagi agud nga umalagwa.
Ag kon may nadakpan, mag-eowas sa pag-take down it peke ag malisyosong videos nga nagatuga it pagtaeang sa publiko, dapat raya nga papanaugan it mabug-at nga penalidad.
Kabay nga gamiton ro teknolohiya sa mapuslanon nga bagay, sa makabulig sa kaugalingon ag sa komunidad ag bukon it makagulo eang ag makadugang eon man it problema.
