INTERNATIONAL News — Magataeana ro Seoul, South Korea it $325 million ukon katumbas it P19 billion agud makahimo it syudad kon sa siin owa it may nagapangasubo sa masunod nga limang dag-on.
Ginaduso ro pagpatuman it nasambit nga inisyatibo matapos nagsaka ro numero it “lonely deaths” ukon godoksa sa mga South Koreans, eabi eon sa mga middle-aged men.
Ro lonely deaths kilaea bilang sangka phenomenon kon sa siin nagakamatay ro mga tawo nga naga-isaeahanon eamang ag nagapabilin nga owa matukiban sa maeawig nga paniempo ro andang eawas.
Suno sa lokal nga mga owtoridad, magasentro ro andang programa sa pagtau sa mga residente it “loneliness counselors” nga mahimo ma-contact 24/7 pinaagi sa hotline, online, in person visits, ag consultations.
Ginaeauman man nga bangud sa mas ginpaeapad nga psychological services, green spaces, nutritional meal plans, ag communal activities nga may titulo nga “365 Seoul Challenge” hay magatueod sa mga indibidwal nga magguwa ag makipag-angot sa iba.
Magalunsar man ro andang lokal nga gobyerno it “search system” agud makilaea ro mga residente nga naga-isaeahanon ag naga-kinahangean it bulig.
“Loneliness and isolation are not just individual problems, but tasks that society must solve together,” ro ginpahayag ni Seoul mayor Oh Se-hoon.
Base sa datus nga ginpaguwa it Ministry of Health and Welfare it South Korea, nag-abot sa 3,661 ro lonely deaths ko nagtaliwan nga dag-on.
Natukiban man nga 84.1% sa mga namatay nga owa eon nakita ro andang eawas hay gineakipan it mga eaeaki nga naga-edad 50 hasta 60 anyos.
