KALIBO, Aklan—Ginpabakod it Sangguniang Panlalawigan it Aklan ro gindihon nga ordinansa it lokal nga gobyerno it Kalibo nga pagatawgon ro andang selebrasyon kada ikatlong domingo it Enero bilang Kalibo Señor Sto. Niño Ati-Atihan Festival.
Sa deliberasyon it 62nd Regular Session it 19th Aklan Sangguniang Panlalawigan, ginpaburan it plenaryo ro naging rekomendasyon it Committee on Tourism Culture and the Arts ag Committee on Laws, Rules and Ordinances ro Kalibo Ordinance No. 2023-0030 nga may titulo nga “Declaring The Official Name of Kalibo Festival Being Celebrated Every Third Sunday of January of Each Year as Kalibo Señor Sto. Niño Ati-Atihan Festival”.
Suno sa Sangguniang Bayan it Kalibo tuyo it andang ginpasa nga ordinansa nga obrahon nga opisyal ag malikawan eon ro nagkaeain-eain nga tawag sa pangaean it dag-unan nga festival nga ginadayo it mga deboto, turista ag mga balikbayan nga nauna eon nga ginbansagan nga Mother of All Philippine Festival.
Pila sa mga kaeabanan nga ginatawag kara hay Kalibo Ati-Atihan, Kalibo Santo Niño Ati-atihan ag Kalibo Señor Sto Niño Ati-Atihan.
