KALIBO, Aklan—Ginpahayag ni Aklan 1st district Sangguniang Panlalawigan member Atty. Nolly Sodusta ro anang pag-oponer sa planong pagpatindog it casino sa Boracay.
Suno kana nga maabu nga ibang lugar nga pwedeng patindugan it casino ag owa raya nagakabagay sa isla.
Ginpahayag dugang nga ro plano hay owa nagakasinanto sa katuyuan it gobyenro nga pagpasarado sa isla ko 2018 sa sueod it an-um agud nga taw-an it daean ro paglimpyo ag rehabilitasyon, apang makaron hay pagapatindugan it panibag-ong istraktura.
Aminado man si Atty. Sodusta nga may bulig ro casino sa ekonomiya it boracay ag banwa it malay, apang may maeain raya nga epekto sa peace and order kun sa siin posibleng magtaas ro numero it kriminalidad , prostitusyon , pagkalhit it iligal nga droga ag iba pa.
Madumduman nga nauna eon nga gintaw-an it ‘go signal’ ni Pangueong Rodrigo Duterter ro pagpatindog it casino sa isla bangud sa kawad-an it pondo nga pagagamiton para sa covid response.
Mag-eowas kara, indi man sigon makasigurado nga puro mga turista eamang ro pagapasugtan nga makasueod sa casino bangud nga indi man kara mapugngan ro mga tumandok nga may kwartang pangsugae.
Samtang, mabahoe man suno kana ro posibilidad nga may koneksyon ro pagpasugot nga magpatindog it casino sa isla ag ro Boracay island development authority ukon BIDA bill sa idaeum it government owned and controlled corporations ukon GOCC.
Samtang, gindugang pa ni Atty. Sodusta nga owa pa it finality ro andang linyada it mga kandidato ni dating kalibo mayor William lachica nga nagapa-ilihir bilang gobernador it probinsiya.
Posible suno kana nga makaron nga adlaw it sabado hay paga-istoryahan it grupo sa andang pueong ro andang mga plano para sa nagahilapit nga eleksyon.
