KALIBO, Aklan–Pabor si Aklan 1st District Sangguniang Panlalawigan member Nemesio Neron sa plano it gobyerno nasyonal nga salary grade para sa mga opisyal it barangay kamana man nga ro magakandidato sa barangay level hay may Bachelor’s degree.
Suno kay Neron, ro barangay ro ginakabig nga pinakamaisot nga porma it gobyerno apang may mabahoe nga papel sa komunidad.
Raya hay bangud nga ro tanan nga problema ag kamaeayran sa pangkabilugan hay maghalin sa barangay.
Ro katawhayan, kaayusan ag development suno kana hay nagasunod sa mandato it kada barangay official.
Dugang pa kara nga nagakadapat eamang nga taw-an it nagakaigo nga kompensasyon ro mga opisyal it barangay.
Sanda sigon ro unang naga-atubang sa mga reklamo ag concern antes raya makaabot sa ibabaw.
May kaangtanan kara, nagapati si Neron nga kinahang-ean nga ro nagadumaea sa sangka barangay hay maaeaam ag kasayuran sa anang trabaho para makato it nagakaigo nga serbisyo sa mga pumueoyo.
