Naga-apela makaron ro mga residente sa bahin it Oyo Torong Street, Brgy. Poblacion, Kalibo sa natungdan nga ahensya it gobyerno nga aksyonan ro stagnant water sa andang lugar.
Suno kay Sarah Crispino nga mabuhay eon nanda nga problema kada naga-uean ro pagtipon it tubi sa karsada.
Nagakabeaka sigon sanda para sa andang ikaayong eawas eabi pa ag mabaho eon ro hugom it tubi kamana man nga naga-inabo ro namok.
Indi man sigon malikawan ro pagtamsak it tubi kada may naga-agi nga saeakyan.
Haeos ginasue-ob eon man sigon ro andang baeay it tubi-baha.
Naghinyu man raya sa lokal nga gobyerno nga magpatigayun it inspeksyon sa andang area agud nga tun-an ro aksyon nga dapat nga himuon.
Ginapatihan nga puno it eutay ro drainage sa lugar rason nga nagatipon ro tubi sa karsada.
