INTERNATIONAL News — Gindeklara it Interior Ministry it Spain ro state of emergency bangud sa nationwide power blackout nga tumama sa mabahoe nga parte it Iberian Peninsula.
Ginpahayag pa it ministry nga ro emergency status hay sueod sa mga rehiyon nga nagahinyu kara.
Sa makaron, naghinyu eon ro Madrid, Andalusia ag Extremadura para sa central government nga i-take over ro public order ag iba pang mga public function.
Samtang, ginpahayag ni Spanish Prime Minister Pedro Sanchez nga owa pa nanda nasayuran ro rason it pagkaduea it suplay it kuryente.
Bangud sa insidente hay napundo ro operasyon it mga paeuparan ag mga train system.
Owa man it nakitang indikasyon it cyber attacks ro European Union bangud sa insidente.
Matapos ro masobra sa an-um nga oras hay amat-ama nga naibalik eon it Spanish power operator nga Red Electrica ro suplay it kuryente.
Naging masako man ro pilang mga residente nga magbakae it mga gasolina para gamiton sa andang mga generators.
Ginpasiguro man it Spanish Government nga andang pagapasabton ro mga una sa likod it pagkaduea it suplay it kuryente.
