INTERNATIONAL News — Ginkumpirma it rebeldeng Houthi halin sa Yemen nga naglunsar sanda it pagpang-atake sa Saudi energy facilities.
Suno sa Saudi-led coalition nga ro oil giant Aramco’s petroleum products distribution station sa Jeddah ro tinamaan nga nagtuga it grabeng sunog sa daywang storage tanks, ag sa mayad nga swerte hay owa it naninahan.
Mataas, mabahoe ag maitom nga aso ro makita sa Red Sea city , kun sa siin presenteng ginapatigayon ro Saudi Arabian Grand Prix.
Insigida man nga nakontrola ro kaeayo.
Antes ro insidente, napabalita ro pagpatigayon it sunud-sunod nga drone ag rocket attacks it Yemen’s Iran-backed Houthi group.
Nauna eon nga gintarget it nasambit nga rebeldeng grupo ro nasambit nga fuel depot ko nagtaliwan nga mga inadlaw gamit ro missiles ag drones.
Gin-atake man ro mga nagapangunang pasilidad sa kapital nga Riyadh.
Nag-ugat ro insidente matapos nga ginpangunahan it Saudi Arabia ro pag-atake sa mga Houthis nga sumakop sa kabisera it Yemen nga Sanaa ko September 2014.
Madumduman nga ginbatikos ro Saudi it bilog nga kalibutan sa paglunsar it giyera sa Yemen ko 2015 matapos nga pumatay it dinosena nga sibilyan kun sa siin raya man ro ginaturo nga rason it pag-atake it Houthis sa kingdom gamit ro drones, missiles ag mortars.
Ko 2020 nga pag-atake, tinamaan ro tangke nga may capacity it 500,000 barrels it diesel fuel.
Ginasugid nga gumastos ro Aramco sa pag-repair it kasamaran it kapin sa 1.5 million dollars.
