KALIBO, Aklan—Ginklaro ni Police Lieutenant Colonel Belshazzar Villanoche, hepe it Kalibo Municipal Police Station nga nakabaehag sa Executive Order nga ginpagguwa ni Aklan Governor Florencio Miraflores ro pagbawae sa mga street food vendor nga magbaligya sa mga kalye sa banwa it Kalibo.
Suno kay Villanoche, masami nga owa nasusunod it mga nasambit nga vendors ro health and safety protocols kontra sa COVID-19 eabi pa ag sangka sawsawan eamang ro ginagamit it andang mga parokyano.
Posible man sigon raya nga maging super-spreader it virus bangud masami nga gina-eabag ro physical distancing it mga bumaeakae.
Ginpunto pa ni Villanoche nga kaeabanan nga nagatumpok ro mga tawo sa sangka cart kun magkaon ukon magbakae it street food butang nga owa man ginapuna it mga manugbaligya.
Naging epektibo sigon ro pagbawae sa mga street food vendor ko Agosto 1 umpisa nga ginpatuman ro Modified Enhanced Community Quarantine (MECQ) sa bilog nga probinsya it Aklan.
Matueopangdan nga base sa ginpagguwa nga bag-ong advisory ni Governor Miraflores napaeawig eon it sang oras ro operasyon it mga establisyemento komersyal halin sa dating alas-4:00 it hapon hay magiging alas-6:00 it agahon hasta alas-5:00 eon raya it hapon.
