KALIBO, Aklan — Ginkumpirma ni Mark Sy, head it Barangay Affairs Office it LGU-Kalibo nga magapabilin ro tandem nanday Mayor Juris Sucro ag Vice Mayor Cynthia dela Cruz sa banwa it Kalibo para sa maabot nga 2025 local and national elections.
Suno kay Mark Sy nga magapatigayon sanda it pormal nga anunsyo it andang official line-up sa idaeum it local party nga Tibyog-Akean sa Lunes, Setyembre 30.
Dugang pa nga makaibahan sa andang linyada nga magapadaeagan bilang Sangguniang Bayan member si dating Kalibo Mayor Engr. Emerson Lachica .
Eakip kara sanday incumbent SB members Atty. Kristine dela Cruz, Raymar Rebaldo, Ketchie Luces ag Ronald Marte.
Samtang, sa pihak it mga pag engganyo nga sumaka sa mataas nga posisyon, mas ginpili sigon ni Mayor Sucro nga padayunon ro anang pagserbisyo sa ikaywang termino.
Owa sigon imaw nag commit it anuman nga posisyon halin sa oposisyon.
Gusto kara nga padayunon ro anang naumpisahan nga mga programa ag proyekto sa banwa .
Nasayuran nga sa idaeum it pagdumaea nanday Sucro ag dela Cruz hay maabu nga awards ag pagkilaea ro nabaton it LGU-Kalibo.
