Natigayon eon nga maaresto ro suspek sa natabu nga mass shooting sa New York City subway ag ginkasuhan it federal terrorism offense ag iba pa .
Suno kay Bombo International Correspondent Greg Aguilar it USA nga naaresto ro 62 anyos nga si Frank R. James, sangka African-American sa East Village sa Manhattan matapos nga makabaton it tip ro kapulisan .
May gintaea nga reward money nga 50,000 dollars sa kon sin-o ro makatau it impormasyon sa ginakahimtangan ni James.
Gina-alegar nga si James hay nagbuhi anay it smoke grenade sa 36th Street Subway Station sa Brooklyn samtang rush hour ag dayun nga nagpamaril kat nagkalhit eon ro asu sa palibot kun sa siin naga-abot sa 23 ro naninahan sa insidente.
Ginasugid nga sambilog sa mga naging yabe sa pagkakita kay James hay ro U-Haul van nga anang gin-rentahan, kun sa siin nadiskubre raya waeong kilometro halin sa gin-eontaran it insidente .
Ro suspek hay nakasuksok it construction vest ag helmet kamana man gas mask kat gin-obra ro krimen.
Gindugang pa ni aguilar nga hasta sa makaron hay indi pa matumod ro motibo sa pagpamaril.
Ginatukib pa kon may diperensiya raya sa paminsaron bangud sa online video nga ginpost kara sa anang social media account nga nagapakita it anang sobrang pagkaakig sa maabu nga mga bagay .
Natukiban pa nga ro suspek hay may dati eon man nga mga kaso .
Sa pihak nga parte, gindugang pa ni aguilar nga ginkumpirma it Philippine Consul General sa New York nga owa it Filipino nga nadaeahig sa insidente .
