KALIBO, Aklan—Ginkasuhan eon ro suspek sa pagbaril-patay sa 22 anyos nga daeaga nga si Nadynne Faith Medina samtang nga nagapasueod sa eskenita pauli sa andang baeay kaibahan ro anang ina ag manghud sa Brgy. Andagao, Kalibo ko Biyernes it gabi-i, Agosto 28, 2020.
Suno kay P/Staff Sgt. Marlon del Rosario it Numancia Police Station, nagapangatubang sa kasong pag-eabag sa Republic Act 10591 ukon Comprehensive Firearms and Ammunition Regulaton Act si Rannie Vicente sa Aklan Prosecutor’s Office.
Kapin sa P200,000 ro gintaeana nga piyansa it korte para sa anang temporaryong kahilwayan.
Apang suno kana nga maskin nga makapiyansa sa kasong andang ginpasaka, natigayon man nga makapasaka ro Kalibo Police Station it kasong murder kontra kay Vicente nga owa it nagakaigo nga piyansa.
Madumduman nga naaresto ko Agosto 31 ro suspek sa anang safe house sa Brgy. Dongon East, Numancia pasado alas-5 it hapon it gintingub nga pwersa it Kalibo ag Numancia Police Station kaibahan ro Regional ag Provincial Intelligence Unit.
Narekober sa suspek ro kalibre 45 nga baril nga nakasukbit sa anang hawak ag ro 38 kalibre nga revolver nga nakatungtong sa lamesa kaibahan ro magazine it 45 nga baril kamana man ro anang motorsiklo.
Gindugang pa ni P/Staff Sgt. del Rosario nga owa man it record sa pulisya ro suspek nga gina-alegar nga bag-o eamang nga nag-istar sa nasambit nga lugar ag nagatrabaho bilang caretaker it sangka tangk.
Sa makaron hay nagapadayun pa ro imbestigasyon it pulisya kon sin-o ro mastermind ukon utok nga nagpapatay sa biktima.
