KALIBO, Aklan—Matapos ro tatlong adlaw nga pag-imbestiga it mga kapulisan, naaresto eon ro suspek sa pagbaril-patay sa 22-anyos nga biktimang si Nadynne Faith Medina it Brgy. Andagao, Kalibo.
Raya hay kasunod it ginpagguwa it Kalibo PNP nga computerized facial composite sketch nga ginpagguwa it Regional Crime Lab Office 6 sa pagkakilaean-an it suspek nga si Rannie Vicente, 35-anyos it Brgy. Dongon East, Numancia nga gina-alegar nga nagbaril-patay sa daeaga.
Si Vicente hay naaresto kahapon sa anang ginatrabahuhan sa banwa it Numancia.
Hugut man ro pagpamalibad it suspek ag gin-insister nga owa imaw it kahilabtanan sa pagpatay sa biktima kamana man nga bukon sigon kara it kilaea ro nasambitang pamilya.
Samtang, sa pihak nga parte, ginpahayag ni Police Major Bellshazaar Villanoche, hepe it Kalibo PNP nga andang naaresto ro suspek pinaagi sa andang maid-id nga pag-imbestiga kamana man nga may mga natipon sandang ebidensya, litrato ag pilang mga saksi sa krimen kung siin nagaturo sa suspek.
Mabahoe man sigon ro naibulig it facial sketch para sa pagkakilaeanhan it gunman.
Kaangot kara, narecover sa baeay it suspek ro sangka 38 ag 45 nga calibre it baril ag ap-at nga magazine.
Madumduman nga ginbaril it makatlong beses ro daeaga samtang nagapauli sa andang baeay halin sa simbahan kun sa siin hay nag-angkon it mga tama it bala sa anang tagipusuon nga naging rason it anang insigidang kamatayon.
Si Vicente hay posibleng magpangatubang it kasong murder ag illegal possession of firearms and ammunition.
