KALIBO, Aklan—Malipayon ro barangay council it Poblacion, Kalibo sa temprano nga pagtumod sa pagkatawo it tatlong indibidwal nga sa likod it pagsueat sa pilang propiedad nga ginapanag-iyahan it lokal nga gobyerno it Kalibo.
Suno kay punong barangay Neil Candelario it Poblacion, Kalibo nga ginsuhestiyon nana kay Kalibo mayor Juris Sucro nga pasabton ro mga raya sa ginhimo nga bandalismo agud nga indi pagtuearon it iba.
Kadungan kara, ginpadumdum nana ro tanan eabi eon ro mga pamatan-on angot sa mga kaeakip kara nga penalidad sa laye.
Pabor imaw nga ipa-community service ro mga raya pinaagi sa paglimpyo sa mismong ginsueatan nga mga lugar.
Base sa naga-eksister nga ordinansa ukon Anti-Vandalism Law, ginabawae ro pagpintura, pagsueat, ag iba pa it mga pribado ag pampublikong propiedad, mag-eowas eon lang kon may pahanugot it tag-ana.
Apang suno kay kapitan Candelario nga masyadong manaba ro penalidad nga naga abot eamang sa P500 pesos.
Samtang, ginpaathag sigon it mga nadakpan nga indibidwal nga self-expression eamang ro andang gin-obra bilang kaparte it andang street protest.
