KALIBO, Aklan—-Daywa ro naugdaw samtang sambilog ro partially damaged sa sunog nga nag-eontad bandang ala-1:56 kaina it aga-aga sa Barangay Andagao, Kalibo.
Base sa report it Bureau of Fire Protection (BFP)-Kalibo, nag-umpisa ro sunog sa baeay ni Lunda Mationg.
Bandang alas-2:41 it aga-aga hay gindeklara nga fire out ro sunog.
Sa interview it Bombo Radyo Kalibo, ginpahayag ni Mrs. Mationg nga madasig nga nagkalhit ro kaeayo bangud sa mga butong ag kahoy nga materyales it baeay, kun sa siin nadaeahig ro baeay it anang unga nga si Jansen Mationg ag sangka daywang grado nga baeay ni Arlene Mationg.
Napan-uhan sigon ro sunog matapos nga matalsikan it kaeayo ro anang nagakatueog nga gumankon.
Maskin nga owa it nasalbar nga anuman nga gamit, apang maswerte suno kana nga eowas sanda tanan nga magpamilya.
Mabahoe ro pagpati it pamilya Mationg nga naghalin ro kaeayo sa ginkabit nanda nga extension wire sa baeayan nga butong nga ginagamit nga saeaksakan it electric fan.
Posible sigon nga nagtapik ro kaeayo sa mga naka-hanger nga eambong dugang pa ro mabaskog nga hangin rason nga owa eon nanda naagapan ro pagkalhit kara.
Sa pihak nga parte, ginpahayag ni FO1 Rene Ajusan, arson investigator it BFP Kalibo nga kaibahan nanda nga nagresponde sa sunog ro estancia sub-station.
Sa makaron hay padayun pa nanda nga ginatumod ro rason ag ro naging danyos sa sunog.
Medyu naging mabudlay sigon ro andang pagresponde bangud sa makitid nga daean sa lugar.
Angot kara, uman nana nga ginpadumdum ro publiko nga maging madahan ag pirmeng i-check ro mga appliances ag iba pang mga gamit sa sueod it baeay kamana man ro mga saksakan agud nga makalikaw sa sunog.
