KALIBO, Aklan—Ginplastar it sangguniang bayan it Kalibo ro pilang mga programa ag proyekto nga nakabaehag sa executive-legislative agenda nga nakasentro sa ikamayad nga eawas, edukasyon, pangabuhian, imprastraktura ag sports development sa unang ika-100 diyas nga pagpanerbisyo it konseho.
Sa ginpatigayon nga session, ginpangaeanan man ro mga top performing nga mga konsehal nga nakahimo it maabu nga mga resolusyon.
Nagpanguna sa may pinakamaabung resolusyon nga gindihon hay si SB member Philip Kimpo.
Base sa record, si Kimpo hay nakalista it 51 nga resolusyon.
Nagapangaywa si SB member Matt Aaron Guzman nga may 30, samtang may 29 si SB member Ronald Marte, 24 ay SB Agosto Tolentino; ag panglima si SB Ketchie Luces nga may 18.
Ginpamilit ni SB member Tolentino nga nakatutuk imaw sa anang trabaho ag gina-research ro kada resolusyon nga ginadihon.
Sambilog sa mga ginapabugae kara nga resolusyon nga ginapanipuslan makaron sa mga kabarangayan it kalibo hay ro pag-install it mga CCTV cameras nga mabahoe nga bulig sa crime prevention.
Mag-eowas kara ro pagbulig nga mataw-an it nagakaigo nga kagamitan eabi eon ro computer set ag printer ro mga taeatapan it senior citizens ag persons with disability ukon PWD sa 16 nga barangay it Kalibo.
Nakaangkon man sigon it epekto ro anang ginpasa nga resolusyon matapos nga ginmandu makaron ni mayor Juris Sucro ro pag-usoy it relocation site it mga vendors agud nga maumpisahan eon ro reconstruction it Kalibo public market.
