KALIBO, Aklan— Padayon ro pagbuhos it mga turista ag bakasyunista nga gustong makit-an ro kaanyag it Isla it Boracay sa nakataliwan nga sang buean halin kat ginbuksan raya sa publiko ko Oktubre 26, 2018.
Suno kay Caticlan jetty port administrator Nieven Maquirang sa interview it Bombo Radyo Kalibo, ginpahayag kara nga naglobo sa 77, 678 ro tourist arrival sa sikat nga isla nga nailista halin ko Nobyembre 1 hasta it 25, 2018.
Dugang pa kara nga masobra sa 3,000 hasta it 3,500 ro influcks it mga turista nga nagasueod sa nasambitang isla kada adlaw nga kaeabanan hay mga local tourist.
Samtang, sa padayon nga monitoring it Inter-agency task force, masobra sa 2,000 man ro mga residente ag workers nga nagasueod kada adlaw sa isla nga kaeabanan kara hay naghalin pa sa mga kaeapit nga banwa it Malay, Aklan.
Sa makaron suno pa kay Maquirang, “systematic” ro ginahimo nandang monitoring sa entry ag exit point it Isla agud masigurong inde maeabag ro ginapatuman nga “one entry, one exit policy” ag ro carrying capacity it tourist arrival nga 6, 405 kada adlaw.
