BORACAY Island — Nakalista it libo-libong tourist arrival sa isla it Boracay sa unang daywang buean it dag-on 2025.
Base sa datos it Malay Toruism Office, ginpahayag ni Kathrine Licerio nga umabot sa kabilugang numero nga 374,958 ro tourist arrival sa isla halin sa buean it Enero hasta it Pebrero.
Kon ikumpara suno kana sa kaparehong period it nagtaliwan nga 2024 hay mataas gihapon raya it masobra sa 602 tourist nga nagbisita sa Boracay.
Nagapanguna gihapon kara ro domestic tourist kapin eon ko buean it Enero halin sa selebrasyon it New Year’s Day hasta sa Ati-Atihan Festival.
Sa pihak kara, ginpahayag dugang ni Licerio nga ginaeauman pa nanda ro dugang nga libo-libong turista kapin eon sa paaeabuton nga summer season.
Sa makaron suno kana hay ginapahauman eon nanda ro igapatigayon nga Love Boracay nga posibleng maga-umpisa sa Abril 25 hasta it Mayo 3 kon sa siin maabong aktibidad ro pagaeauman it mga bisita kaparehas it international sporting events, beach parties ag maabong iba pa.
Samtang sa pihak nga parte, pagaeauman pa ro kapin sa pitong cruise ship sakay ro libo-libong mga turista nga magabisita sa isla it Boracay.
Suno kay Licerio, napueo eon ro nag-abot nga cruise vessel nga ginakaeakipan it lima ko buean it Enero ag lima man ko buean it Pebrero.
Makaron nga buean it Marso suno kana hay ginapahauman eon nanda ro maiden call sa Seabourn Quest nga cruise ship.
Raya ro unang kahigayunan nga magabisita ro nasambit nga cruise vessel sa Boracay.
Samtang, positibo ro tourism sector nga magahatak it maabong turista ro bag-ong celebrity Tourism Ambassador for the Philippines, ro South Korean singer-songwriter and actor nga si Seo In Guk.
Madumduman nga nagrampa raya sa sikat nga isla it Boracay agud nga markahan ro anang unang experience sa maanyag nga baybayon.
Si Seo In Guk, hay makikipagbuligan sa Department of Tourism (DOT) agud nga ipromote ro Pilipinas sa South Korean market ag fans worldwide kamana man magapalig-on sa relasyon it South Korea ag Pilipinas.
Nasayuran nga ro South Korea ro consistent top market para sa Pilipinas.
