KALIBO, Aklan—Umabot sa haeos 62,608 ro tourist arrival sa isla it Boracay sa sueod it daywang dominggo makaron nga buean it Oktobre.
Base sa ginpaguwa nga datos it Malay Municipal Tourism Office halin Oktobre 1 hasta it 15, sa nasambit nga numero hay 46,773 ro mga domestic tourist; 596 ro mga overseas Filipinos ag overseas Filipino workers kamana man 15,239 ro mga foreign tourist.
Bangud kara, mas kapin pang nagbaskog ro kumpyansa it ahensya nga maabot ro 1.8 milyon ukon masobra pa nga target tourist arrival hasta sa matapos ro dag-on 2023.
Ginaeauman nga libo-libo pang mga turista, bisita ag bakasyunista ro magasueod sa isla it Boracay partikular sa mga nagahilapit nga deklaradong special non-working holidays maghalin sa adlaw it eleksyon hasta it Undas ukon pyesta minatay.
Mag-eowas kara, kapin sa limang cruise ship man ro nakataeana nga magbisita sa isla nga magahakot it ginatantyang kapin sa 10,000 nga mga bisita.
Nasayuran nga uman nga ginkilaea ro Boracay bilang sambilog sa mga best island sa Asia rason nga inde maduea sa bucket list it mga turista nga bisitahan ro sikat nga isla it Boracay sa bilog nga kalibutan.
