KALIBO, Aklan – – – Nahueog ro trailer truck nga may kargang backhoe sa bangin sa Kampo Verde Brgy. Rigador samtang raya hay nagapadueong sa area it Brgy. Poblacion, Ibajay.
Suno kay PO1 John Francyl Roga it Ibajay PNP, nakaangkon it minor nga kasakitan sa eawas ro driver nga nakilaea kay Anthony Dumanon, 37-anyos ag ro anang daywang ka mga pahinante nga nakilaea kanday Nickomedes Sanico, 45-anyos ag Arnel Aligaya, 34-anyos ag parehong residente it Roxas City.
Base sa andang inisyal nga imbestigasyon, mechanical failure ro naging kabangdanan it nasambitang aksidente kon siin pag-abot sigon sa kurbada nga porsyon it karsada hay nadueaan it preno ro trailer truck butang nga ginsunggab it driver sa concrete barrier hasta nga nahueog raya sa idaeom it bangin.
Si Dumanon hay presenteng naka-confine sa Ibajay District Hospital para sa anang nagakaigong pagbueong samtang ro daywang ka mga pahinante hay gin refer man sa outpatient department matapos nga maeapatan it medikasyon.
Uwa it naireport nga bystander sa nasambitang lugar kat mahueog ro nasambitang behikulo.
Sa makaron, ro trailer truck ag backhoe hay nagapabilin sa gihapon sa idaeom it bangin it kampo verde samtang padayon man ro imbestigasyon it Ibajay PNP.
