Kalibo, Aklan-Naging madinaeag-on ro pagtililipon it masobra sa 200 exhibitors, buyers, ag sellers sa ginpatigayon nga B2B Global Travel Exchange ag Roadshow ko Hulyo 22, 2024 sa Brunei.
Raya hay gin-organisa it Global Tourism Business Association (GTBA) kabulig ro One Klik Events, Association of Travel Agents Brunei (ATAB), Local Government Unit it Malay ag Boracay Island Travel and Tour Operators Association (BITATOA).
Ro travel exchange ag roadshow hay gindungan sa ikaywang general membership assembly it Global Tourism Business Association kon sa siin sambilog sa mga naging keynote speaker hay si Malay mayor Frolibar Bautista nga gintambungan man it iba pang mga diplomat halin sa Taiwan, Japan, Malaysia, Thailand, Indonesia, Vietnam, ag iba pang personalidad maghalin sa industriya it turismo ag negosyo.
Ro Global Tourism Business Association hay aktibong nagaduso sa magpaumwad it turismo pinaagi sa pakikipagpueong sa mga lideres it nasyon nga nagakomponer sa Association of SouthEast Asian Nation.
Angot kara, sangka memorandum of agreement (MOA) ro ginpirmahan sa tunga it Association of Travel Agents Brunei (ATAB) ag Global Tourism Business Association (GTBA) it Pilipinas agud iduso ro turismo sa tunga it daywang nasyon.
