KALIBO, Aklan—Eubus nga ginkalipay it tribu Apo ni Inday matapos nga maangkon ro back to back nga kampeonato sa balik-ati category sa Sadsad Ati-Atihan Festival Contest sa kakatapos eamang nga selebrasyon it Kalibo Sr. Sto. Niño Ati-Atihan Festival 2025.
Ro nasambit nga tribu hay naghalin pa sa Brgy. Calangcang, Makato ag dekada eon nga nagapanaad kay Sr. Sto. Niño de Kalibo.
Suno sa tribal leader nga si Melvin Sentonis, masobra pa sa premyo nga P145,000 pesos ro andang nabatyagan nga kalipay matapos nga nagbunga it kadaeag-an ro andang pagtinguha ag sakripisyo para eamang makapasakop sa nasambit nga paindis-indis.
Kapin sa tatlong buean nanda nga ginhimo ro costume nga human sa buli ag iba pang indigenous nga materials kon sa siin kada dag-on hay naga-isip gid sanda it kakaibang disenyo agud nga may makit-an nga bag-o kanda ro mga tumaean-aw.
Ro andang panaad kay Sr. Sto. Niño nga maghalin pa sa andang namatay nga tatay hay ginsunod eon man ko andang mga onga sa bulig it andang mga tagasuporta.
Ro tribu hay ginabilog it masobra sa 60 ka mga miyembro nga halo ro mga inonga ag mga magueang.
Ro balik-ati category hay nagasimbolo it dinaan nga ati nga ginapasundayag sa ginakabig nga Mother of All Philippine Festivals.
