Ginaandam ro mabagyo nga silangang baybayon it China sa pag-abot it Typhoon Dolphin, nga nagresulta eon sa kapin 1,000 nga pagkansela it mga flight, evacuation ag pagpatuman it pinakamataas nga typhoon alert.
Sa Shanghai, kapin 1,400 ka flight sa daywa ka panguna nga airport ro gin-cancel, samtang 270 ka flight sa Hangzhou Airport sa Zhejiang Province ro naapektuhan.
Ginapaabot nga mag-landfall ro bagyo sa Zhejiang ukon Fujian sa gab-i it Domingo ukon temprano sa Lunes.
Nagpaguwa ro China National Meteorological Centre it red typhoon alert, ro pinakamataas nga lebel it babala, bangud sa ginapaabot nga mabaskog nga uean sa Zhejiang, Shanghai ag mga bahin it Fujian, Anhui ag Jiangsu.
Sa Fujian, kapin 99,000 ka residente ro gin-evacuate halin sa mga lugar nga delikado, samtang sobra 200 ka ferry routes ro gin-suspende ag mga construction vessel ro ginpabalik sa pantalan.
Una eon nga nakaigo ro Typhoon Dolphin sa Okinawa, Japan, nga nagresulta sa pito ka minor injuries ag kapin 5,000 ka panimaeay nga nawadan it kuryente.
Sa Taiwan, gin-suspende man ro mga ferry service ag kapin 180 ka flight bangud sa mabaskog nga uean ag hangin.
