KALIBO, Aklan—Uman nga nadepensahan it Vikings ro andang titulo sa Kalibo Ati-Atihan festival street dancing competition sa tribal big category kontra sa Black Beauty Boys, sangka perennial champion nga nagapangaywa sa kompetisyon.
Umpisa 2020, raya ro ikaywang kahigayunan nga napierde it Vikings nga naghalin sa banwa it Makato ro Black Beauty Boys it Linabuan Norte, Kalibo.
Nadag-an nanda ro P1-milyon pesos nga cash prize, ro pinakamabahoe nga gintaeana nga premyo sa kasaysayan it Ati-Atihan contest.
Naging hataw sa andang performance ko Sabado ro Vikings sa pagsabak sa kompetisyon ag napa-bilib man ro mga judges sa andang makolor ag magarbong costumes kontra sa pitong iba pang tribung nagpasakop.
Nabo-oe man it Vikings ro tatlong minor awards, ro best in costume, best in beats and sounds ag most discipline samtang ro Black Beauty Boys hay may special award para sa best in street dancing.
Suno kay Hark Tesorero, tribe leader it Vikings umpisa nga magpasakop sanda sa Ati-Atihan it Kalibo hay todo ro andang pagtinguha nga makaangkon it disiplina ag may panata sa Sr. Sto. Niño ro grupo.
Samtang, gin-uli it Black Beauty Boys ro P300,000 pesos nga cash prize.
Ro Maharlika tribe man ro third place nga may P170,000 pesos nga premyo.
Kabilugan nga P3.380-milyon ro gintaeana it Kalibo Ati-Atihan Festival Board makaron nga dag-on para sa mga magadaog sa Kalibo Sadsad Ati-Atihan contest.
Ro iba pang kategorya hay Tribal Small, Modern Tribal ag Balik Ati.
