KALIBO, Aklan—Uman nga nagbaeayluhan it akusasyon ro presente ag dating presidente it Kalibo Sr. Sto. Nino Ati-Atihan Management Council, Inc. ukon KASSAMACO sa tunga it atrasadong pagsumite it financial report it nasambit nga festival organizer sa ginpatigayon nga ati-atihan festival ko buean it Enero.
Suno kay Editha Ureta-Reyes, presidente it KASSAMACO nga matsa tinamaan sanda it bagyong Ursula sa gulping pag-aywan kanda it dating presidente nga si Apolonio “Apol” Zaraspe III nga owa it nagakaigo nga turnover it mga dokumento sa ginsudlan kara nga mga transaksyon.
Ginklaru nana nga draft pa eamang ro memorandum of agreement ukon MOA nga gin presentar kanda it lokal nga gobyerno it Kalibo angot sa pagtukod it Kalibo festival executive board nga ginkadismaya ni Zaraspe. Umpisa kato, owa eon nagpakita kanda si Zaraspe hasta nga nagpasa raya it anang resignation ko Disyembre 4, 2019.
Samtang, ginsabat ni dating KASSAMACO president Apol Zaraspe nga sobra pang Yolanda ro gin-obra kana it LGU-Kalibo pinaagi kay Mayor Emerson Lachica.
Ro tanan nga mga meetings suno kana hay gintugyan nana sa board secretary rason nga may nagakaigo raya nga dokumento.
Nagapati imaw nga palpak ro andang pagdumaea sa selebrasyon it ati-atihan festival 2020 rason nga kana ginbasoe ro tanan.
