Ginaboeobanta nga naga-abot sa $30.5 bilyon ro kabilugan nga gross output nga naituga it FIFA World Cup 2026 sa ekonomiya it Estados Unidos, base sa estimate sa pagtuon nga ginpatigayon para sa FIFA ag World Trade Organization (WTO).
Kaibahan sa mga nagapangunang ginboe-an it kita hay ro turismo, transportasyon, hotel, pagkaon, retail, ag iba pang komersyal nga aktibidad nga tuga it torneo.
Suno kay Bombo International News Correspondent Pinoy Gonzales nga matapos ro torneo, napabalita nga naka-eksperyensiya it mabahoe nga pagtaas sa paggastos it mga turista ag lokal nga manugbakae sa mga host city kapareho it Philadelphia ag Kansas City.
Sa pihak kara, ginpamilit sigon it pilang mga ekonomista nga maskin mabahoe ro kinita it aktibidad sa ekonomiya it mga siyudad nga naging host, posibleng mas limitado ro pangmabuyan nga epekto kara sa kabilugan nga ekonomiya it Estados Unidos.
Mag-eowas kara, kumita man ro FIFA it kapin sa $11 bilyon halin sa commercial, advertisement, ticket sales ag iba pa.
Angot kara, gindugang pa ni Gonzales nga makabig man nga well-covered ro FIFA World Cup 2026, nga naglista it mabahoe nga audience sa telebisyon ag digital platforms sa nagkaeain-eain nga parte it kalibutan.
Ro final it FIFA World Cup 2026 hay ginatantiya nga umabot sa kapin sa 1.8 bilyon ro nag-abang sa bilog nga kalibutan rason nga makabig nga raya hay nagapabilin nga sambilog sa pinakamabahoe nga sporting events sa kasaysayan.
Samtang, nagbaton ro Spain it $50 milyon ukon masobra sa ₱2.9 bilyon bilang premyo matapos maangkon ro kampeonato sa FIFA World Cup 2026, ro pinakamabahoe nga premyo nga gintau sa kasaysayan it torneo.
Raya hay kaparte it $871 milyong kabilugan nga pondo it FIFA nga ginpasakupan it 48 nga mga nagpasakop nga nasyon.
Samtang, nagbaton man ro Argentina, nga nagtapos bilang runner-up, it $34 milyon, samtang $30 milyon ro naagto sa ikatlong puwesto nga England ag $28 milyon sa France nga nagtapos sa ika-ap-at nga puwesto.
Mag-eowas sa performance-based prize money, kada team nga nagpasakop sa torneo hay nagbaton man it qualification ag preparation funds halin sa FIFA.
