IBAJAY, Aklan — Patay matapos barilin sa loob ng kaniyang tanggapan sa munisipyo ang bise alkalde ng Ibajay, Aklan na si Julio Estolloso, bandang alas-9:15 ng umaga ng Biyernes, Agosto 8, 2025.
Ayon sa ulat, sinasabing nasa loob ng Sangguniang Bayan session hall si Estolloso nang dumating ang suspek na si SB member Mihrel Senatin.
May hinihingi umano itong kopya ng lahat ng mga ordinansang naipasa sa staff simula sa kanyang pag-upo sa pwesto.
Pagkatapos nito ay hinarap umano niya ang biktima at tinanong kung ano ang kanyang kasalanan dito kasabay ang pagkuha sa kanyang baril at pinaputukan ng anim hanggang pito beses ang bise alkalde.
Nagtamo ng multiple gunshot wounds ang biktima na karamihan ay tumama sa kanyang kaliwang dibdib. May narekober na mga basyo ng bala ng Gloc 17 9mm revolver ang narekober sa crime scene.
Naglabasan ang mga empleyado at mga taong nakikipag-transaksyon sa lugar matapos marinig ang sunud-sunod na putok ng baril.
Pinauwi muna ang mga empleyado at kasalukuyang naka-kordon ang buong munisipyo.
Agad na umalis ang suspek na naaresto umano ng mga miyembro ng Ibajay Municipal Police Station sa kanyang bahay habang isinugod naman sa Ibajay District Hospital ang biktima pero binawian din ng buhay dakong alas-10:23 ng umaga.
Kasamang nakuha ng mga awtoridad ang baril na ginamit sa krimen na gagamiting ebidensiya.
Ang suspek at biktima ay kapwa miyembro ng local political party na Tibyog-Akean.
Patuloy ang imbestigasyon ng mga awtoridad sa insidente.
Samantala, sa halip na kasiyahan, nabalot ng kalungkutan ang pagdiriwang ng taunang Melchor’s Day ngayong araw ng Melchor Memorial School sa naturang bayan, kung saan, nagsisilbing principal si Vice Mayor Estolloso sa naturang paaralan.
