KALIBO, Aklan–Maskin nga owa pa nakasueod sa Pilipinas ro monkeypox, apang nagpaguwa eon it advisory ro world health organization nga maghimo it nagakaigo nga pagdahan ro tanan.
Suno kay Dr. Philip Ian Padilla, public health expert it University of the Philippines ukon UP-Visayas nga ginatun-an makaron it WHO kon may bag-ong strain it nasambit nga sakit bangud nga kaeabanan nga tinamaan kara halin sa Western countries hay owa man it history of travel sa Africa.
Sa nasambit nga nasyon sigon makita ro kaabuan nga kaso kara bangud nga maabu idtu nga kasapatan kapareho it amo, eanggam, squirrel ag iba pa ro infected it virus.
Ginpaathag ni Dr. Padilla nga ro monkeypox virus hay bukon it masyadong makataeapon kapareho it covid 19 rason nga indi dapat nga magpanic.
Nagatapon raya sa tawo pinaagi sa close contact sa nina, bodily fluids ukon respiratory droplets halin sa tawo, sapat ukon contaminated material.
Kaibahan sa sintomas kara hay kapareho it pag angkon it chicken pox ukon suea-eob nga ginaeakipan it eagnat, rash, ag swollen lymph nodes.
Kaeabanan raya nga makita sa mga extremities kapareho it alima, uyahon, paead, siki ag sangkiri eamang sa eawas.
Epektibo man sigon ro bakuna para sa small pox sa monkey pox.
Kon indi matapna hay posibleng uman sigon raya nga maging epidemic.
Ginlaygay pa nana nga magsuksok it fitted nga face mask, maayos nga airflow sa sangka lugar, pirmeng limpyuhan ro alima ag magpatuman it physical distancing.
Ro nasambit nga protocol suno kana hay bukon eamang it pagpangaman kontra covid 19 kundi nga para man sa monkey pox.
Napabalita ro pagtuhaw it monkeypox virus sa US, Canada, ag sa UK ag iba pang European countries.
