Kalibo Aklan ——-Patay ro sangka 10 anyos nga ungang babaye samtang nanihan ro ap-at nga iba pa matapos madaganan it delivery truck ro sangka mini-mart sa pakurbadang daean pasado alas-10:00 kaina it agahon sa Diversion Road, Brgy. Mambog, Banga, Aklan.
Halin sa siyudad it Iloilo, igahahatud kunta it truck sa banwa it Ibajay ro kargang kapin sa 700 nga sako it abono kat pumalya ro anang preno rason nga bumagsak raya sa nasambit nga baraka .
Insigidang nakaguwa ro driver ag pahinante it truck nga nag-angkon it nina sa anang ueo .
Gindaea ro mga biktima sa Aklan Provincial Hospital nga puro nag angkon it slight injuries, apang gindeklarang dead on arrival ro unga nga si Remy Villar, residente it nasambit nga lugar nga gindaea sa sangka pribadong ospital nga naigpit it bumagsak nga truck.
Samtang, nakilaea ro truck driver nga si Jonafel Berbal, 40 anyos ag residente it Pototan, Iloilo.
Ginasugid nga accident-prone ro lugar eabi eon sa mga madasig nga nagapadaeagan nga motorista.
Sa kustodiya it Banga Police Station ro driver it truck nga nagapangatubang sa kasong Reckless Imprudence Resulting in Homicide and Serious Physical Injuries ag Damage to Properties.
Nagpatigayon man it flushing ro mga miyembro it Bureau of Fire Protection matapos na mag-hugum it gasolina sa lugar.
