BALITANG Espesyal — Nakatabing sa tagipusuon it kaabuan ro nag-viral nga istorya it sangka 11-anyos nga ungang eaeaki nga halin sa Ukraine hay nagbiyahe nga naga-isaeahanon paagto sa Slovakia.
Ginhatud eamang imaw it anang ina sa istasyon it tren nga indi maaywan ro anang lola.
Agud nga masiguro ro kaeowasan it unga, ginsueat kara ro numero it anang kaigbataan nga paga-agtunan it unga pag-abot sa Bratislava , ro kapital it Slovakia kamana man ro sangka plastic bag ag ro anang passport.
Maabu ro nagbulig ag nagpakaon sa unga hasta nga maka-abot raya sa anang gina-agtunan .
Kat mabalitaan man it anang ina nga maayos nga naka-abot ro anang unga , hantup sa tagipusuon raya nga nagpasaeamat sa mga tawong may mayad nga tagipusuon nga naging instrumento agud nga maka-abot it maayos ro unga .
Ginpaathag it ina, gin-obra eamang nana raya para sa kaeowasan it unga eabi pa ag nagtuhaw ro balita nga eubus nga peligroso eon sa andang lugar bangud sa gina-alegar nga nuclear power plant nga ginapuntirya sigon it Russia.
Indi nana maibhan ro unga sa pag-bakwit bangud nga indi nana maaywan ro anang ina nga indi makatikang .
Maabu man ro nagdayaw sa ungang eaeaki sa kaisog nga ginpakita sa anang pagbiyahe .
Sa makaron hay malipayon eon imaw nga kaibahan ro anang ap-at nga mga igmanghud sa Slovakia.
Ginsaysay it unga nga sambilog sa anang eubus nga ginkahadlukan sa pagbiyahe hay ro maga-isaeahanon sa pagsakay sa tren nga masyadong puno it tawo ag ro paghambae sa kaugalingon nga lenggwahe .
