Nabalot it abo ag masangsang nga hugom it asupre ro 11 lugar sa probinsya it Negros Occidental.
Raya hay kasunod it panibag-ong pageupok it bulkan Kanlaon, ku adlaw it Myerkules, Mayo 14, nga nagbuhay it limang minuto, base sa opisyal nga record it Philippine Institute of Volcanology and Seismology (Phivolcs). Ro nasambit nga pageupok hay nagtuga it kabilugang 38 volcanic earthquake kun siin ro pila kara hay nabatyagan man it mga residente.
Suno sa Provincial Disaster Risk Reduction and Management Council – Emergency Operations Center (PDRRMC-EOC) it Negros Occidental, naapektuhan ro maabong mga barangay halin sa La Carlota, Bago, San Carlos, La Castellana, Murcia, San Enrique, Valladolid, Pontevedra, Hinigaran, ag Binalbagan.
Sa Bago City, 23 barangay kara ro nakaeksperyensya it ashfall samtang 11 barangay sa La Carlota City ag siyam nga barangay sa La Castellana ro nageksperyensya man it volcanic ash ag masangsang nga hugom it asupre.Sa Bacolod City, 18 barangay kara ro nakaeksperyensya it ash particles ag uean.
Ku Martes it aga-aga, May 13, hay unang eumupok ro nasambit nga bulkan ag nagbuga it tone-toneladang aso ag volcanic materials. Uwa nag buhay, maabong lugar ro naapektuhan it ashfall, nga uman man nga nasundan sa mga masunod nga inadlaw.
