KALIBO, Aklan — May mga gaob sa eawas ag owa it eambong nga pang-ubos kat makit-an ro bangkay it sangka 14-anyos nga babaye sa sangka katunggan sa Brgy. Unidos, Nabas, agahon it Biyernes, Enero 17, 2025.
Nagapadayun pa ro imbestigasyon it Nabas Municipal Police Station sa insidente partikular ro pagtumod sa suspek.
Base sa report, nakita ro bangkay it biktima kaina it agahon it anang tiyo nga naka-agi sa nasambit nga lugar.
Nauna eon nga nag-ea-ong ro biktima kabi-i sa pamilya nga maga-agto sa piso wi-fi agud nga maggamit it internet , apang owa eon raya naka-uli .
Ginasugid nga ro anang tiyo ro nagturo sa ginakahimtangan it biktima kun sa siin nasapwan raya it mga rumespondeng tanod nga nagahapa sa tubi ag owa it eambong nga pang ubos .
Owa man ginaduea it mga awtoridad ro posibilidad nga ginhimuslan ro dalagita .
Samtang, eubus ro kasubo it pamilya it biktima sa anang gindangatan .
