KALIBO, Aklan–Nagpakitang gilas ro mga manugturo halin sa nagkaeain-eain nga district offices it Department of Education (DepEd)-Aklan para sa nakaangdan nga pagpatigayun it Sinaot sa Calle angot sa selebrasyon it Kalibo Sr. Sto. Niño Ati-atihan Festival 2023.
Halin sa 19 ka mga district offices nga nagsadsad, an-om sa mga raya ro nagpasakop sa kompetisyon.
Nasaksihan it mga pumueoyo ro dance performance it mga manugturo sa ground it Kalibo Pastrana Park kung siin todo effort ro kada isaea sa andang costume.
Suno kay Mr. Rex Manarez it Muguing Elementary School nga malipayon sanda nga uman nga makabalik sa pagsadsad matapos ro daywang dag-on nga pagpaiway it face-to-face celebration it Ati-atihan bangud sa pandemya.
Kaparte eon sigon raya it andang panaad sa batang Hesus.
Dati sigon hay naga-costume imaw nga naka-diaper ag body paint apang makaron hay gin-iba eon kara ro anang estilo bangud daeaga eon ro anang unga.
Mag-euwas kara, makita man ro pagdaea it ibang manugturo it imahe ni Sto. Niño nga nagasimbolo it andang debosyon.
