KALIBO, Aklan—Ginaboeobanta nga tatlong ektarya it kaeanasan ro nasunog pasado alas-12:00 udtro adlaw it Huwebes, Mayo 16, sa Barangay Caano, Kalibo.
Suno sa report it Bureau of Fire Protection – Kalibo, nag-umpisa ro sunog sa kaeanasan nga parte it nasambit nga lugar bandang alas-12:30 ag madasig nga nagkalhit ro kaeayo bangud nga masyadong uga ro mga pananum sa lugar.
Insigidang nagpatigayon it fire fighting ro mga bumbero kamana man ro mga residente nga nag-bucket brigade.
Ginpahayag dugang nga maeayo man ro mga panimaeay sa lugar nga gin-eontaran it sunog rason nga owa it naapektuhan ukon nadaeahig nga mga kabaeayan.
Makataliwan ro haeos sang oras ag tunga hay natapna eon ro kaeayo ag gindeklara ro fire out bandang alas-2:00 it hapon.
Ginasugid nga bangud sa ginsug-an nga ‘ugabhang’ rason nga nagtuhaw ro grassfire.
Owa masyadong nagtuga it kahalitan ro sunog bangud nga natigayon eon nga ma-ani ro paeay ag puro nga dagami eon lang ro nabilin.
Samtang, uman nga nag apela ro BFP Kalibo sa tanan nga likawan anay ro magsuga eabi pa ag masyadong mainit ro tiempo nga kaeabanan nga nagaresulta sa grassfire.