NEW WASHINGTON, Aklan — Ginklaru it barangay council it Puis, New Washington nga puro pangayaw sa andang lugar ro mga kaeaeakin-an nga eakot sa nag-eontad nga komosyon nga nagresulta sa pagka-ospital it 22 anyos nga biktima nga nabun-an ag naeab-an sa kinagamo.
Suno kay Kagawad Honoraro Ruel it nasambit nga lugar nga nagtaeabu eamang sa andang barangay ro daywang grupo it mga kaeaeakin-an ko hapon it Domingo, Agosto 31 it makaron nga dag-on.
Natabo ro insidente matapos nga nagkita ro magtimbang nga parte sa karsada maeapit sa baraka kon sa siin tatlong eaeaki nga sakay it sangka motorsiklo nga ginasugid nga taga-Brgy. Jaeas ro nagabakae kunta it aeak.
Nakasub-eang nanda kara ro tatlong motorsiklo sakay ro kapin sa waeong kaeaeakin-an nga ginasugid nga mga taga-Brgy. Guinbalewan ag nakaangkon it komprontasyon.
Sa inisyal nga imbestigasyon it New Washington Municipal Police Station, nakadaeagan ro biktimang si Roy Tuing rason nga uwa eon nasundan ro anang lastro sa hita nga gilayon man nga nadaea sa Aklan Provincial Hospital para sa anang nagakaigong pagbueong.
Sa mayad man nga swerte ag may tagob sigon ro sanduko nga gingamit sa pag-eabu sa anang leog rason nga owa raya napuruhan.
Nagapati ro opisyal nga posibleng bangud sa dating tima-tima ro rason it gulo.
Kagawad Honoraro Ruel it Puis New Washington
Sa pihak nga parte, ginpahayag ni Nelwen de Jose, driver it motorsiklo ag kaibahan it biktima nga nangawa sanda matapos nga gin-tambangan it mga suspek nga puro armado.
Suno kana nga blangko sanda sa motibo bangud nga owa man nanda naka away ro mga suspek.
Posible suno kana nga natapangan ag nasae-an eamang sanda ro andang posibleng naka away ko nagtaliwan nga fiesta.
Nelwen de Jose, kaibahan it biktima
