KALIBO, Aklan — Ginpaidaeum eon sa inquest proceeding ro tatlong suspek sa insidente it pagpanakaw it baka sa Brgy. Aquino, Ibajay, Domingo it aga-aga, Agosto 25.
Raya ro ginkumpirma ni P/SSgt. Jane Vega, information officer it Aklan Police Provincial Office (APPO) .
Matapos nga makasuhan it Anti Cattle Rustling Law, ginsaylo ro mga suspek sa custodial facility it Ibajay Municipal Police Station.
Madumduman nga na-intercept sanda sa banwa it Balete pinaagi sa bulig it CCTV footage.
Suno kay Vega nga naging madinaeag-on ro hugut nga koordinasyon it Balete ag Ibajay Municipal Police Station rason nga nabaeabagan ro sangka topdown nga multicab nga ginkargahan it baka nga nakataeana kunta nga pagadaehon sa siyudad it Roxas agud nga ibaligya.
Owa eon nakabalibad ro mga suspek sa saea nga nahimo rason nga ginkasuhan ag ginkulong.
Nasayuran nga nagtaeana it padya nga kapin sa P20,000 ro tag-ana it baka sa sin-o man nga makatau it impormasyon sa nagbo-oe sa anang alagang sapat.
Sa pihak nga parte, gin aku man it APPO nga base sa intelligence gathering, owa it organisadong grupo sa probinsiya it Aklan nga eakot sa serye it mga panakawan.
