KALIBO, Aklan — Naging magarbo ag makulay ro pagpasundayag it 34 nga tribu ag grupo nga nagpasiklaban sa nagkaeain-eain nga kategorya sa gin-abangan nga Kalibo Sadsad Ati-Atihan Festival contest makaron nga adlaw it Sabado, Enero 18 sa bisperas it Kapiestahan ni Senor Sto. Niño de Kalibo.
Dumagsa ro mga festival goers nga sumaksi sa street dancing it kapin sa 3,200 nga Ati-Atihan members.
Pinakamaabu nga nagpasakop sa Modern tribe nga may 11, samtang pito man sa Tribal Big Category, siyam sa Tribal Small ag pito sa Balik-ati Category.
Ro pagakilaeahon nga kampeon sa Tribal Big Category hay magabaton it grand prize nga P1.1 milyon.
Sa kabilugan nga P3.695 milyon nga premyo street dancing contest, ginsabat ni Kalibo mayor Juris Sucro ro sang milyon piso agud nga mas pa nga maging espesyal ag kaabang-abang ro kompetisyon.
Dikara masayuran kon mapabilin it defending champion nga Black Beauty Boys it Linabuan Norte, Kalibo ro andang titulo kontra sa iba pang pang grupo nga Vikings it Dumga, Makato, Tribu Linabuanon it Linabuan Norte, Kalibo, Maharlika it Dumga, Makato, ag Libtong Boys it Estancia, Kalibo.
Ro mga participants sa tribal big ro may kabilugan nga premyo nga P1.890 milyon, kun sa siin ro champion sa nasambit nga kategorya hay maga-uli it pinakamabahoe nga premyo sa kasaysayan it Ati-Atihan.
Hin-aga it gabi-i masayuran ro mga nagdaeaog sa pagahiwaton nga awarding ceremony sa Kalibo Magsaysay Park.
