Bangud sa padayun nga tensyon sa Middle East, ro Public Employment Service Office ukon PESO Aklan OFW Help Desk hay haum nga magbulig sa mga Akeanon nga OFWs ag andang mga pamilya nga nagakinahangean it impormasyon, assistance, ukon koordinasyon sa mga natungdan nga ahensya it gobyerno.
Suno kay Marsh Bernabe, PESO Aklan Manager nga base sa andang record, ap-at pa eamang nga Akeanon OFWs ro nabuligan nga ma-repatriate ukon mapa-uli, kun sa siin, daywa sa mga raya hay nag-agto mismo sa andang opisina.
Padumdum nana sa mga OFW sa Middle East ukon may kapamilya idtu ag nagakinahangean it bulig ukon gustong magpangutana angot sa presenteng sitwasyon, pwedeng makipag-angot sa andang taeatapan.
Pwede man sigon nga mag-message sa andang Facebook page ukon magbisita sa andang opisina umpisa Lunes hasta Huwebes alas-8:00 it agahon hasta alas-5:00 it hapon sa Provincial Capitol .
Ro PESO Aklan suno kana hay padayun nga nakatutok ag haum nga magsabat sa kinahangeanon it mga OFWs ag andang mga pamilya sa probinsiya.
Ro andang opisina suno kana ro nagasirbing unang taeatapan nga nagabaton ag naga-proseso it mga request for assistance para sa repatriation it mga OFW.
Nakikipagbueuligan sanda sa Department of Migrant Workers, Overseas Workers Welfare Administration ag One Repatriation Command Center agud nga maayos nga maibalik sa nasyon ro mga OFW eabi eon sa Middle East.
Samtang, owa sigon imaw sa ideya angot sa mga ginatau nga financial assistance sa mga nag-uli nga OFW.
