KALIBO, AKLAN — Naeowas it Philippine Coast Guard (PCG) ro an-om nga turistang Chinese nationals nga sakay it nagtik-eob nga paraw sa kadagatang sakop it Brgy. Manocmanoc sa isla it Boracay.
Suno kay PO1st Condrito Alvarez it PCG-Caticlan, patapos eon kunta ro aktibidad it mga turista kat makaangkon it subasko kon sa siin bangud sa mabaskog nga hangin hay uwa nasarangang imaniobra it mga crew ro paraw kabangdanan nga eomugdang.
Nasayuran nga kapin sa 100 metro eamang ro kaeayuon sa front beach it SB Mask Boy III nga ginamaneho it boat captain nga si Tonton Casidsid it Brgy. Argao, Malay,Aklan.
Ro mga dumueoong hay una eon sa mayad nga kahimtangan ag naguyod eon ro saeakyang pandagat sa binit it baybayon.
Sa pihak nga parte, ginkumpirma it Coast Guard nga tatlong adlaw eon nga ginabawae ro pagpatigayon it sea sports activity sa front beach it isla bangud sa mabaskog nga hangin ag humbak.
