KALIBO, Aklan—Nabayluhan it kasadya ro kasubo nga nabatyagan it sangka 74 anyos nga lola nga nauna eon nga nabiktima it pekeng kwarta.
Raya hay matapos nga bayaran it pekeng kwarta nga nagabalor it P1,000 ro biktimang si Fidelina ‘Deling’ Garcia, residente it Paraiso Road Brgy. Linabuan Sur, Banga samtang nagabaligya it anang mga tinuea ag panakot, Lunes it agahon kadungan it market day sa sueod it Banga Public Market .
Suno kay Jay-Ar Arante, head it Media Team it LGU-Kalibo nga natabing ro baeatyagon ni Kalibo Mayor Juris Sucro matapos nga maka-abot kana ro nasambit nga impormasyon.
Bangud kara, kaibahan ro anang staff hay gin-usoy nanda ro magueang kaina it agahon agud nga taw-an it bulig pinansyal ag mga groceries .
Mabahoe sigon ro pagpasaeamat it lola nga negosyante bangud nga owa nana ginaeauman nga maibalik ro anang kapital nga ginbo-oe it manugloko.
Samtang, bangud sa kaeo-oy sa magueang hay gin post it sangka netizen ro anang nadangatan nga insigida man nga nagtrending sa social media.
Sa interview it Bombo Radyo Kalibo, ginpahayag ni lola Deling nga ulihi eon nana nataeupangdan nga peke ro ginbayad kana it eaeaki kat ginkilatis it anang mga kaibahan nga vendor.
Doble sigon ro anang kasubo kahapon bangud nga gintaw-an pa nana it sinsilyo ro eaeaki nga 820 pesos matapos nga magbakae it tinuea ag mantika nga nagabalor tanan it 180 pesos.
Nasayuran nga pagpangloko eamang ro tuyo it eaeaki bangud nga matapos nga mataw an it sinsilyo hay gin-aywan kara ro anang mga ginpangbakae.
