KALIBO, Aklan — Ginpaidaeum eon sa inquest proceedings sa Aklan Prosecutor’s Office, agahon it Biyernes para sa kasong pageabag sa Article 308 ukon Theft ro siyam nga mga suspek nga ginaturo nga responsabli sa mga nagakatabu nga panakawan sa banwa it Altavas.
Bangud sa madasig nga aksyon it mga awtoridad, naaresto ro mga suspek nga ginapatihan nga miyembro it Salisi Gang.
Sangka negosyante ro nagreklamo sa Altavas Municipal Police Station agahon it Huwebes matapos nga mataeupangdan nga naduea ro anang bag nga may sueod nga kapin sa P20,000 nga cash .
Modus it grupo nga ginapaeapitan ag gina-istorya ro negosyante nga gustong biktimahon.
Samtang pilit nga ginabo-oe ro atensyon it biktima kaibahan ro anang helper, nagahueag ro ibang kasabwat agud nga mabo-oe ro target nga bag ukon kwarta sa kaha.
Naaresto ro mga suspek sa ginpatigayon nga follow operation it kapulisan sa bulig it mga residente ag pilang barangay tanod nga nagahana eon kunta nga magpaeagiw sa boundary it Altavas ag Capiz .
Pito sa mga raya hay nagsakay sa RoRo bus nga may rota nga Cubao samtang ro driver ag sambilog pa hay nagpabilin sa andang get away vehicle.
Nabaeabagan ro mga raya kat ginparahan ro ginsakyan nga bus sa may Altavas Municipal Cemetery.
Positibo man nga nakilaea ro pilang suspek sa gin-review nga CCTV footages.
Presenteng nakakulong ro mga suspek sa Aklan Rehabilitation Center nga ginaeakipan it ap-at nga eaeaki ag limang babaye.
