KALIBO, AKLAN – – – Kapin sa 12 ka mga menor de edad ro gina alegar nga buyot it sangka 34 anyos nga eaeaki nga naga mandu kanda nga magpatigayon it pagpanakaw partikular eon sa Brgy. Nalook, Kalibo.
Suno kay Police Senior Inspector Honey Mae Ruiz, OIC Chief of Police it Kalibo PNP Station makabig nga maka-alarma ro makarondaya nga sitwasyon bangud sa pang idaron nga 12 anyos pataas hay expose eon sanda sa paghimo it kremin partikular eon ro pagpanakaw.
Nasayuran nga natukiban ro modus it suspect nga si Joel Litawa, tumandok it Valenzuela City ag nakapangasawa it taga-Brgy. Nalook, Kalibo matapos nga gin takaw ro cellphone it sangka police officer sa nasambitan nga lugar.
Gin follow up sigon it mga barangay tanod ro insidente ag natigayun nga matumod kun kanyo naagto ro cellphone.
Sa asawa it suspect ro nasambitan nga cellphone ag nagpabutyag it kapahauman nga iga balik raya sa natungdan.
Sa pagpatawag sa mga inunga sa Kalibo PNP, gin hayag ku mga raya nga gina paeag sanda ni Litawa nga paga patchon kun indi magtuman sa anang gina sugo.
Nasayuran nga insigida man raya nga nakapaeagyu matapos masayuran nga sangka pulis ro nabiktima.
Gina sugid nga pila sa mga nabiktima ro mga panimaeay ag mismong eskwelahan sa lugar.
Gina derecho sigon it mga inunga ro andang matakaw nga kagamitan sa suspect ag raya ro naga baligya ag gina taw-an eamang sanda it parte.
Samtang, matapos nga gin patawag sa Kalibo PNP ro 12 ka mga menor de edad, insigida man sanda nga gin release ag gina determina pa sa makaron kun may unang discernment agud sa pagpasaka it naga kaigong kaso.
Ro suspect nga si Litawa hay posibling magpangatubang it kaso bangud sa pagbayolar kara sa RA 7610 ukon Child Abuse kamana man it Theft By Principal Inducement.
