KALIBO, Aklan – – – Gin baril-patay ro sangka utilily worker maeapit sa eskwelahan nga anang ginatrabahuhan sa barangay Panayakan, Tangalan.
Nag-angkon it multiple gunshot wounds sa anang ueo ag sa kilid nga parte it anang eawas ro biktimang si Vicente Tingne Jr., residente it nasambitang lugar.
Suno kay SPO3 Rene Miguel imbestigador it Tangalan Municipal Police Station (MPS) nakabaton ro andang taeatapan it tawag maghalin sa sangka residente it nasambitang lugar nga naga-imporma nga may nag-eontad nga pagpamaril.
Insigidang nagresponde ro katapo it Tangalan MPS ag nakit-an sa lugar ro biktimang patay nagahamyangon ag uwa eon it kabuhi maeapit Panayakan National High School bangod sa maabong tama it baril.
Suno sigon sa mga residente maeapit sa lugar nakabati sanda it limang eupok it baril.
Samtang, sangka barangay tanod man ro gin kustodiya it kapulisan matapos nga magpumilit nga sudlon ro crime scene nga gin kordon eon it otoridad.
Gin kilaea raya kay Ernie Pastrana ag residente it nasambitang lugar.
Gin paidaeum man raya sa body search kun sa siin narekober kana ro sangka brown nga bag ag .357 revolver nga baril kamana man ro 19 ka mga bala.
Dugang pa kara, may narekober man nga sang pares it puti nga gloves.
Gin kustodiya si Pastrana sa Tangalan MPS bangud sa obstruction of justice.
Nakataeana man raya nga iga paidaeum sa parrafin test para sa nagakaigo nga imbestigasyon.
