KALIBO, Aklan — Gin padumdum it Aklan Police Provincial Office (APPO) ro mga makikisadya sa Ati-Atihan Festival nga may igapatuman nga gun ban sa sang dominggong selebrasyon.
Suno kay SPO1 Nida Gregas, tagapaghambae it APPO, naga kahueogan raya nga indi eon pwedeng magbitbit it baril sa gowa it baeay.
Solong mga miyembro eamang sigon it Armed Forces of the Philippines ag Philippine National Police nga magapatigayun it andang official duties ag nakasuksok it uniporme ro exempted.
Sa pihak nga parte, gin pamilit ni Gregas nga bawae eonman ro pagdaea it mga backpacks, iligal nga droga ag mga paraphernalia, kamana man ro pagpanigarilyo sa mga pampublikong lugar, mga mataeum nga bagay ag de-botelyang ilimnon sa sueod it festival zones.
Naga abot sa 19 nga mga police assistance centers ro gin tukod sa mga naga pangunang karsadahon sa banwa it Kalibo ag maga butang man it outer ag inner border security agud mas pang hugtan ro seguridad sa mga bisita ag mga turista.
Gina eauman nga 1,000 pulis, suldado ag iba pang force multipliers ro iga pakalhit sa bug-os nga selebrasyon.
