KALIBO, Aklan – Suportado it Department of Tourism (DoT) ro pag-angkon it independent body nga magaamlig sa development ko isla it Boracay kasunod it ginapangatubang nga environmental crisis.
Apang, ginpahayag ni DoT Assistant Secretary Ricky Alegre sa Bombo Radyo nga mabuhay pa ro proseso antes matukod ro ginaproponer nga Boracay Island Development Authority.
Sa makaron sigon hay kinahang-ean anay nandang makipagbuligan sa provincial government it Aklan ag LGU-Malay para sa full-swing nga rehabilitasyon kapin eon ro pagpasaayos it drainage system nga pagapondohan it Tourism Infrastructure and Enterprise Zone Authority (TIEZA) it kapin sa P1.1 billion.
Ginpahayag dugang ni Asec. Alegre nga pagaobligahon sigon nanda ro 47% sa 1,900 nga establisimento sa Boracay nga magkabit sa sewerage treatment plant.
Welcome man kanda ro ginasumbil it business tycoon nga si Lucio Tan nga magpatindog it pangaywang drainage system sa Boracay nga igakonekta sa wastewater treatment.
Sa pihak nga parte, ginduea ni Alegre ro kahawag it mga stakeholders ag residente sa isla matapos nga ideklara ni Pangueong Rodrigo Duterte ro total closure umpisa sa Abril 26.
Sa oras sigon nga matapos ro trabaho hay uman nga pagabuksan sa mga turista ro Boracay apisar nga uwa pa natapos ro an-om nga buean.
Sa oras nga mag-umpisa ro closure, insigidang pagatutukan ro pagpaeapad ag construction sa mga karsada, pagpawasak sa mga iligal nga istraktura sa wetlands ag forestlands, pag-ayos ag pagdugang it drainage system ag sewer lines, pag-install it mga solid waste management facilities ag nagakadapat transportasyon sa isla.
