KALIBO, Aklan — Ginpasiguro it Metro Boracay Police Task Force (MBPTF) ro kaeowasan it mga turista sa uman nga pagbukas ko Isla it Boracay sa Oktubre 26.
Suno kay S/Supt. Jesus Cambay Jr., hepe it MBPTF ag presenteng deputy director for operations it Police Regional Office 6, eowas sigon ro mga turista sa pagsueod sa ginatawag makaron nga bag-ong Boracay bangud padayon nga pagbueoligan it mga pumueoyo ag stakeholders agud malikawan ro mga krimen, terorismo ag pagkasamad it palibot.
Mag-eowas sa tatlong barangay sa isla hay nagpakalhit man ro mga kapulisan sa outer ag inner control borders it Boracay.
Ginpasiguro man ni Cambay ro andang kahauman sa igapatigayong dry-run sa Boracay halin it Oktubre 15 hasta it 25 kon siin pagapasugtan ro mga lokal nga turista agud magpatigayon it assessment.
Kapin sa 25 ro certified compliant hotels and resorts nga pagapasugtang maka-operate sa uman nga pagbukas it isla.
