KALIBO, Aklan— Target it pulisya nga makaangkon it zero major crime incidents sa selebrasyon it Sto. Niño Ati-atihan Festival sa banwa it Kalibo, Aklan sa Enero 2019.
Suno kay Aklan Police Director Senior Superintendent Lope Manlapaz, ro seguridad sigon nga igapatuman hay kaparehas sa ginpatigayon sa Asia Pacific Economic Cooperation summit sa isla it Boracay.
Gintaeana ro site task group Ati-atihan para magta-o it seguridad, public safety ag emergency response sa mga turista ag deboto sa ginakaeangkagan ag ginakabig nga “Mother of All Philippine Festival”.
Dugang pa kara nga magabutang sanda it 23 nga mga assistance detachments sa mga strategic areas agud masiguro ro matawhay ag maayos nga festival.
Ro kapiyestahan ni Señor Santo Niño de Kalibo hay maga-umpisa sa Enero 2 hasta it 20, 2019.
