KALIBO, Aklan — Nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka drug surrenderee ag haba-habal driver matapos nga maaresto sa ginpatigayon nga buy-bust operation bandang alas-5:00 it aga-aga sa Sitio Bantud, Brgy. Manocmanoc sa isla it Boracay.
Nakilaea ro suspek nga si Jovanie Toquero, alyas “Robin”, 37, tubong Sagay City, Negros Occidental ag presente nga naga istar sa Sitio Lugotan sa nasambit nga barangay.
Gin aresto si Toquero matapos nga mabak-ean it sangka sachet it ginadudahan nga ginpamaea nga dahon it marijuana it sangka poseur buyer.
Sa ginpatigayon nga body search, nabo-oe sa suspek ro P600 nga boodle ag marked money kamana man ro lima pang sachet it marijuana ag sangka glass pipe.
Aminado ro suspek nga kaabuan sa mga customer hay mga dumueuong nga kaeabanan nga nagabakae kana sa gabi-i.
Nasayuran nga kaibahan man si Toquero sa mga suspek sa serye it mga nagakatabong panakawan sa isla.
