KALIBO, Aklan — Agaw atensyon sa isla it Boracay ro sangka sand art sa kilid it baybayon nga nagatau it pasidungog ukon pagkilaea sa mga namatay nga miyembro it Boracay Dragon Force team, may sang domingo eon ro nagtaliwan.
Ginpakigbahin it nasambit nga grupo ro litrato it sand art nga may nakabutang nga “Salute to the 7 paddlers”.
Namatay ro pitong miyembro it team nga ginaeakipan it ap-at nga eaeaki ag tatlong babaye nga paddlers matapos nga kumueob ro andang ginasakyan nga baroto sa baybayon nga sakop it Brgy. Manocmanoc sa isla.
Madumduman nga hinampak it mabaskog nga humbak ro andang baroto nga himo sa fiber glass rason nga raya hay kumueob samtang nga nagapatigayon it routine training para sa paga-intrahan nga international competition sa Nobyembre sa Taiwan.
Sa makaron hay nagapabilin nga suspindido ro karera ag training it dragon boat sa isla samtang ginatun-an pa ro emergency protocols nga kinahangeanon.
