KALIBO, Aklan — Namatay ro sangka motorcycle rider ag ro anang angkas matapos sanda nga bumangga sa sangka van sa Brgy. Feliciano, Balete, aga-aga it Huwebes.
Sa report ni P/Chief Master Sgt. Jerick Dadivas it Balete Police Station, pasado alas-2:00 it aga-aga kat matabu ro insidente sa pakurbada nga karsadahon it nasambit nga lugar.
Nagapa-uli eon kunta ro mga biktimang sanday Marold dela Vega, 22, sakay it ginamaneho nga motorsiklo ag ro angkas nga si Jemar Elias, 23, parehong residente it Brgy. Cortes, Balete halin sa Brgy. Alas-as, Madalag sa bisperas it kapiestahan sa lugar kat matabu ro aksidente.
Kat paliko sanda sa pakurbadang karsada hay gina-alegar nga inagaw ro andang linya it gulping nagsuepot nga van nga ginamaneho ni Norie Gregorio, 49, ag residente it Brgy. Magpag-ong, Batan nga paagto man sa pihak nga direksyon.
Madasig pareho ro daeagan it daywang saeakyan ag sa kabaskog it impact hay inapok ro mga biktima nga sakay it motor.
Nadaea pa si dela Vega sa sangka pribadong ospital apang namatay man bangud sa grabeng kahalitan sa ueo ag eawas samtang ro angkas nga si Elias hay gindeklarang dead-on-arrival sa provincial hospital.
Bandang alas-4:00 it aga-aga hay boluntaryo nga nagsurender ro driver nga posibleng magapangatubang sa kasong 2 counts it reckless imprudence resulting in homicide and damage to property samtang nakakulong sa detention cell it Balete PNP.
